محور الكون

"كل واحد عنده سببين إنه يعمل حاجة؛ سبب حلو، وسبب حقيقي" - ج. ب. مورجان.

لما حد يسألني "انت ليه اخترت الشُغلانة ده؟" دايمًا بلاقي نفسي بتفلسف وأنا بجاوب. بقول جمل زي "عشان بحب أساعد الناس" و"أصل ده الشغف بتاعي". بس ده فعلًا اللي يتقال عليه سبب وجيه، مش حقيقي.

احنا متبرمجين اننا ندور على المكانة، و القبول من الناس اللي حوالينا. عشان كده لما حد بيحاول يجاوب على السؤال ده، بيدوّر على الإجابة اللي هتخلي شكله حلو قدام الناس.

بصراحة، أنا مش شايف إن في أي حاجة غلط في كده. ده واحد من الطرق اللي خلت البني أدمين يكوّنوا مُجتمعات. بس مع وجود الـ social media، الموضوع زاد بصراحة. عشان احنا عارفين إن في ناس "بتتفرج"، في رغبة دفينة اتغذيت جواك... وخليتنا دايمًا عايزينهم يشوفوا أكتر.

المضحك في الموضوع إن مع كل اللي بنقدر نشوفه على الـ social media، ماحدش واخد باله مين بيعمل إيه.

احنا محور الكون بتاعنا. كل واحد جوا الـ bubble بتاعته بيفكر في نفسه أكتر ما بيفكر في الناس اللي حواليه. لما حد بيشوف عربية غالية في الشارع مش بيفكر في اللي سايقها... هو مش شايفه أصلًا. هو بيفكر في قد إيه العربية دي شكلها حلو، وممكن كمان يتخيل نفسه سايقها.

خلاصة الموضوع إننا بنقضي حياتنا كلها بندوّر على المركز العالي، بنحاول نشتري حاجات غالية، وعايزين نعيش حياة الرفاهية عشان نثير اعجاب الناس ويحسسونا اننا مهمين. بس الحقيقة هي ان محدش مهتم.

و ديه مش حاجة وحشة، بالعكس ممكن تكون ميزة تخلي الواحد يعرف ان عنده حرية يعمل اللي هوا عايزه. مافيش قيود بتجبره انه يعيش بشكل مُعين...عشان يعجب اللي حواليه.