الـ social media بتجبرنا نقارن نفسنا بالناس اللي بنتابعها. مهما أقنعت نفسك إن ده مش بيحصل... كده كده الـ content هيأثر عليك حتى لو مش واخد بالك.
المقارنة بالناس اللي حوالينا موجودة في طبيعتنا. وعشان في 3.6 مليار شخص بيستخدم مواقع الـ social media في العالم (من المتوقع انهم يوصلوا 4.1 مليار في 2025)، 50 مليون مستخدم لفيسبوك في مصر، و 13 مليون مستخدم انستجرام، بنلاقي غصب عننا إنها بتأثر علينا بطريقة سلبية. طبعًا مش هنقدر ننكر إن المواقع دي بتفيدنا كتير زي إننا بنتعلم من خلالها حاجات جديدة، بنقابل ناس مختلفة، بنعبر عن نفسنا، وغيرها.
لازم تاخد بالك إن الاستخدام الزيادة للمواقع دي بيأثر على ثقتنك بنفسك وحبك لشكلك وجسمك. 87% من الستات، و 65% من الرجالة بيقارنوا جسمهم بالناس اللي بيتابعوهم. فطبيعي تحس إنك أقل من الألفات اللي بتتابعهم. الناس دول بيحسسوك إنهم عندهم أحلى جسم، شغل، وحياة عمتًا... كإنهم أبطال الفيلم وانت لامؤخذة كومبارس.
ممكن يكون إنت مش قادر تدرك إن الصور اللي بتشوفها دي هي مقتطفات مختارة بعناية من حياتهم. زي بالظبط لما تعوز تنزّل صورة جديدة؛ بتفضل تتصور لحد ما تلاقي أحلى صورة. من 50 لـ 60% من الناس بيتصوروا من 2 لـ 5 صور عشان يلاقوا "أحلى واحدة"، ممكن كمان الموضوع يوصل لـ 10 صور. يعني اللي انت بتشوفه عندهم هي الصورة الفائزة من بين 10 مشاركين على الأقل.
اتأكدت إن الناس دول مش عايشين حياتهم كإنهم خارجين من فيلم جيمس بوند؟ تمام أوي، كده خلصت أول خطوة -وأهم خطوة- عشان تقلل التأثير السلبي للـ social media عليك.
تاني خطوة هي إنك تتحكم في الوقت اللي بتقضيه على الـ social media. في documentary كانت نتفلكس عملته اسمه The Social Dilemma كان بيناقش إدمان الـ social media؛ الفيلم كان بيقول إن أصحاب المواقع دول بيتعاملوا معانا إننا products مش customers، يعني بالبلدي هم بيبيعونا إحنا مش بيبيعولنا. بالظبط كده، زي ما سمعت. الشركات دول زي فيسبوك وتويتر بيبعوا المعلومات بتاعتنا عشان يطلعلنا إعلانات تناسب أذواقنا.
الـ algorithm معمول مخصوص عشان ندمن المواقع دي ونفضل نقلب فيها -ما احنا بنشوف الحاجة اللي على مزاجنا على طول- وساعتها، حتى لو سيبنا الموبايل هنبقى عايزين نرجع تاني نشوف الحاجة اللي بتبسطنا (حتى لو امبساط مؤقت).
طيب، إزاي تقلل أو تتحكم في وقت استخدامك للموبايل؟
1- سيب الموبايل بعيد عنك أو في حتة انت مش شايفها لما تكون بتشتغل أو بتعمل حاجة.
2- ممكن كمان تتحكم في الـ screen time من settings الموبيل أو باستخدام applications تانية زي Freedom؛ أنسب فترة هي ساعة أو اتنين في اليوم.
أما بالنسبة لتالت نقطة فهي إنك تقفل الـ notifications أو تعملها silent. ممكن يكون الموضوع صعب شوية في الأول بس صدقني هتلاقي نفسك بقيت productive أكتر.
لو حاسس إن مصير الدنيا في إيدك وماينفعش تعيش من غير notifications، اقفل بس الحاجات اللي ملهاش لازمة. صورة محمد صاحبك اللي نزلها على فيسبوك أكيد مفيهاش طريقة القضاء على الفقر مثلًا.
رابع نقطة هي إنك تعمل unfollow لأي حد بيهز ثقتك بنفسك، بالذات الحاجات اللي بتحسسك إنها مستحيل تكون بتحصل على أرض الواقع. تقدر تقرا الدراسة دي وتعرف أكتر عن التأثير السلبي للـ influencers على ثقتك بنفسك، الـ mood بتاعك، وحياتك عمتًا.
النقطة الخامسة والأخيرة هي إنك تحاول تحقق توازن في الحاجة اللي انت شخصيًا بتنزلها. مش لازم كل حاجة تبقى ببدلة أو فستان سواريه، انت عارف إن حياتك كلها مش كده وانك بتبقى مبسوط بحاجات تانية كتير مش بتنزلها على الـ social media. ماتضايقش اللي حواليك ولا نفسك إن حياتك مش زي اللي اتولدوا وفي بوقهم معلقة دهب (لإن دي مش حياتهم الحقيقة أصلًا).
طبعًا كل دي مجرد طرق بنحاول نتحكم بيها في عوامل خارجية... بس مش خارجة عن سيطرتنا. عشان نختصر الكلام ده، جمعنالك النقط اللي فاتت:
الفرق بينك وبين الناس اللي بتتابعهم هي الـ filters اللي بيستخدموها، بس الواقع مش كده خالص.
اتحكم في الوقت اللي بتقضيه على الـ social media.
اظبط الـ notifications عشان يجيلك المهم منها بس.
اعمل unfollow أو mute للناس اللي بتستفز مشاعرك.
حاولل تحقق balance في الحاجة اللي بتنزلها.
خليك فاكر إن مفيش حد perfect هنا (ولا احنا، ولا انت، ولا هما)!
Comments